Það fer óstjórnlega í taugarnar á mér að heit nachos ídýfa skuli kölluð eðla…ég meina COME ON!

Næstum jafn slæmt og þegar fólk, jafnvel fólk sem ég ber mikla virðingu fyrir kallar föstudag, fössara…algjörlega hræðilegt…ok kannski ekki jafn slæmt og fössari en næstum því.

Alla vega, ég elska heita nachos ídýfu, þið vitið, þessi hefðbundna með rjómaosti, salsa-sósu (salsa þýðir sósa á spænsku þannig að…sósu-sósa) og rifnum osti.

Ég hristi aðeins upp í þessu hefðbundna í smá boði sem ég var með um daginn og setti gráðaost og hlynsýróp útá og ég verð bara að segja að þið hafið ekki smakkað eðlu (insert kjánahrollur) fyrr en þið hafið smakkað bláeðlu (insert algjör lamandi kjánahrollur).

Í eitt meðalstórt fat þarftu:

Hálfa dós af stórum rjómaosti

Eina krukku af salsa

Einn poka af gratínosti

Hálfan gráðaost (skorinn smátt)

Hlynsýróp

Rjómaostinum er makað neðst í fatið, salsa þar ofan á og svo gratínosturinn, síðan er gráðosturinn mulinn yfir og smá af sýrópi sett yfir. Bakað við 200°C í ca 20 mínútur og sýrópi bætt útá áður en þetta er borið fram, helst með Cool American Doritos (bláa), nú eða bacon Tuc kexi, það er líka ROSALEGT.

Þetta verður næstum óbærilegt heitt, mæli með því að leyfa þessu að kólna í 5 mínútur áður en fatið er borið fram, svo er gott að láta skeið fylgja með til að ná öllum ostinum…mmm.