Napolipestóið er súper einfalt en hrikalega gott. Byggt á Napolitana pizzu hugmyndinni sem gengur út á hráefni sem tákna liti ítalska fánans, tómata, basil og mozzarella. Kexið er ostakex frá Carr’s, tómatpestó og sneið af mozzarella kúlu.

Í eina stóra krukku (0,5L) af tómatpestói þarftu:

• 700gr litla tómata
• 7 hvítlauksrif (helst rauð)
• Handfylli af ferskum basil laufum
• Góða ólívuolíu
• Salt og pipar

Ég einfaldlega set allt í matvinnsluvél og blanda saman þar til ég fæ rétta þykkt, ég vil gjarnan hafa pestóið gróft með tómatbitum, svo má líka bara smakka þetta til.

Síðan Costco opnaði hef ég verið duglegur að heimsækja og prófa nýja hluti frá fyrirheitna landinu. Mikið af vörunum, sérstaklega grænmeti og ávöxtum sem þarna fást eru bara á einhverju öðru leveli. Angel Sweet tómatarnir eru dísætir og henta frábærlega í pestóið og reyndar líka bara sem snarl. Það sem er eiginlega ótrúlegast er að boxið sem er 1 kg kostar innan við þúsund krónur.

Svo er Buffalo mozzarella osturinn sem fæst í Costco algjör veisla og með rjómakenndri miðju.

Þessi réttur er frábær með sætu hvítvíni og hentar fullkomnlega í partýið eða sem forréttur.